DHARMA WACANA 1

Kawigunan Sastra Sajeroning Urip

Suksma aturang titiang antuk galah sane sampun kapicayang ring titiang . Kaping ajeng, mantuka ring para panureksa sane dahat wangiang titiang. Asapunika taler Ida dane pamilet dharma wacana puniki sane tresna sihin titiang.

Sadurung nglanturang dharma wacana puniki, lugrayang riin titiang ngaturang rasa angayu bagia , majeng Ida Sang Hyang Widhi, duaning majanten wantah saking pasuecan Ida, titiang, rauhin ida dane prasida sadu ajeng iriki, ring rahinane sane becik puniki. Riantukan sapunika sami , titiang ngaturang pangastungkara “Om Swastyastu”.

Inggih ida dane sane wangiang titiang, inggihan unteng dharma wacanan titiang mamurda “Kawigunan Sastra Sajeroning Urip”.

Ida dane sane kusumayang titiang, minabang titiang ida dane sampun sauninga pulo Bali puniki sane alit puniki kakasubang pisan. Napi awinan asapunika ? Lianan ring palemahanne sane asri, taler sangkaning Bali madue aksara , basa, lan sastra newek. Sane ketah kesambat aksara, basa, lan sastra Bali.

Ida dane sane wangiang titiang, maosang sastra Bali makeh pikenohnyane sajeroning kauripan. Awinan ring sastra Bali mungguh sakancaning kaweruhan sane kabuatang sajeroning urip. Kaweruhan sane munggah sajeroning sastra Bali, sakadi : wariga, inggihan indik ala ayuning padewasan. Agama, weda, Itihasa, Babad, Tantri, Lelampahan, tur makasami punika wenten kawigunan ipun sajeroning kauripan. Sakadi : Tantri, sane nyritayang carita indik beburonan, sajeroning carita punika makeh madaging tetuek indik laksana ayu, sane sandang laksanayang ring jagate puniki.

Asapunika taler ngeninin Itihasa , yadian sane mawangun parwa , kekawin, lan kidung. Makasmi mawiguna sajeroning urip. Santukan sapunika, ring galahe kadi mangkin banget titiang matur ring ida dane, utamane ring para yowana ngiring ngawit mangkin,  pelajahin sastra punika, anggen cermin utawi sasuluh sajeroning kauripan . Santukan widya sastra punika maka wiweka , miubang becik kalawan kaon , waluya suluh rikala kapetengan , mawastu sida nyinahang iwang patute punika . Yening urip tanpa sastra , nirdon urip ring jagate.

Ring Nitisastra wenten kabaos asapuniki :

Hemani sang mamukti dumadi

Ika tan hana guna

Yowana , rupawan, kula, wicala, ika pada hana

Tan aceja wedana makucem,

Zuwir seka ring sami abang murub

Tan hana wangin ika

Teges ipun :

Kaon pisan numadi dados jatma

Sane asapunika tan magama anom, bagus , wangsa, luih , siteng

Yen ten madasar sastra

Romane ucem tan pacaya

Tan bina kadi bunga barak ngendih nanging tan mabo miik.

Ida dane sane wangiang titiang , punika sami anggen pratiwimba.

Sampunang nenga- nenga mlajahin sastra. Duaning marupa kapatutan iraga maprawerti maka panrestian jatma luih guna.

Inggih ida dane sane kusumayang titiang , wantah asapunika atur titiang. Kirang langkung titiang nunas sinampura. Puputang titiang antuk paramasantih “ Om Santih Santih Santih Om “.