DHARMA WACANA 2

‘SUKSMANING METATAH / MESANGIH’

“Om Swastyastu”

Malarapan antuk manah ning suci nirmala ring Ida Sang Hyang Widhi Wasa tur purwa pangastungkara, anggen titiang atur pangaksama ring Ida Sang Hyang Parama Kawi sane maraga sarining tutur sujati muah sarining sastra sane dahat mautama.

Nenten lali titiang ring ida dane para sutresna, para panureksa, para pamilet pacentokan dharma wacana, muah sane maraga wagmi, ring basa lan sastra Bali sane wangiang titiang. Ring galahe sane becik puniki titiang jagi ngawitin ngaturang dharma wacana sane mamurda “Suksmaning Matatah / Mesangih”.

Ida dane pamiarsa sane angayubagia, minabang titiang ida dane sampun tatas uning makeh upakara yadnya sane kemargiang utawi kelaksanayang olih umat Hindu sane jenek ring jagat Bali. Wenten upakara dewa yadnya, manusa yadnya, rsi yadnya, pitra yadnya, miwah bhuta yadnya.

Silih tunggil upakara iwawu sane pacang odar titiang inggih punika, upakara Manusa Yadnya. Ring upakara manusia yadnya taler wenten pah-pahan ipun ,makadi :

ü   Wenten upakara garba wedana / magedong-gedongan ritatkala bobotan mayusa 5 (lima) utawi 7 (pitung) sasih.

ü   Wenten upakara rare embas  kasanggra antuk banten dapetan

ü   Wenten upakara bulan pitung dina, ri sesampunne anake alit mayusa 42 (petang dasa dua) rahina . Raris upakara nelu bulanin

ü   Wenten upakara otonan sesampunne mayusa 6 (nem) sasih

ü   Selantur ipun wenten upakara menek dae truna , sane ketah kabaos ngeraja sewala utawi ngeraja singha

ü   Wenten taler upakara metatah / mesangih muah upakara pawiwahan

Upakara sane sandang tincepang suksman ipun ring galahe sane becik puniki inggih punika upakara Metatah / Mesangih.

Ring ajah-ajahan agama Hindu, upakara inucap sampun pastika pisan kemargiang ritatkala yowanane mayusa kirang langkung 17 (pitulas) warsa, utawi sampun menek duur, tetujone mangda dados putra sane suputra.

Asapunika taler upakara metatah punika mresidayang ngawe trepti ring angga, inggih punika untune dados rata sane ngranayang listuayu wong pawerti , bagus apukik yan wong lanang.

Sapa sira ja sane durung ngemargiang upakara puniki kinucap nenten mresidayang lempas dening sifat utawi bikas kerakasan sane kabaos ‘asuri sampad’. Punika mawinan upakara puniki wenang kemargiang sumangdane prasida ngicalang male utawi leteh sane maneripu ring angga sarira. Mapan ring sajeroning angga sarirane, nenem mesehe sane sandang katreptiang utawi kaeret sane kabaos ‘Sad Ripu’. Indike puniki kasurat ring kakawin Ramayana.

Ida dane pamiarsa sane kabaos Sad Ripu , inggih punika :

              Kama

Kamane punika yan imbayang titiang sekadi jaran guyang , yening nenten tegul sinah makecog merika – meriki , punika sandang prektyaksang utawi watesin boya ja kaicalang, bilih – bilih kama sane becik , sakadi mapikayun sugih majalaran anteng ngambil karya , asapunika taler mapikayun dados sang sujana malarapan antuk seleg malajah.

              Lobha

Lobha inggih punika pikayunan mangda maderbe akeh jalarin antuk dharma, sekadi medagang nenten dados nguluk – nguluk .

              Krodha utawi Brahmantya

Krodhane punika yening wenten pikobet sampunang kosek, pikayunin antuk pikayun sane sadu dharma.

              Mada

Inggih indike puniki sandang pikayunin. Napi pikolih anake sane punyah ? memadat ? Akeh semetonne sane sampun lampus sangkaning miras puniki. Ngiring waspadayang tur pretyaksayang sampunang mateteger utawi main coba – coba , yan bilih kangkat sampunang ajerih mapajar ‘nenten’ , mangda iraga nemu rahayu.

              Moha

Sekadi sane sampun katur iwawu  , mada ngranayang punyah . Wit saking punyah madados moha anrawang – anrawung , malengok tan pesemu ucem kadi sekar pucuk mabejek. Yan imbayang titiang  sekadi anake sane pegatin tresna , bingung awinan mamanah ngulah pati. Indayang waspadayang indike puniki.

              Matsarya

Puniki yening nenten pretyaksayang mejanten sampun ngawetuang rasa sekel, tan suka mamangguh wong len nemu bagia. Gingsinang kayune asapunika.

Punika  mawinan wenten upakara metatah  utawi mesangih , nemem untune sane baduuran sumangdane dharmane stata menang ngungkulin I Sad Ripu, regede matilar, kasucian rauh manadados daiwi sampad utawi sifat-sifat kedewataan sane ngawetuang rasa teleb ring sastra agama, rasa angen kapiolasang ring wong len, rasa bhakti ring guru rupaka, guru pengajian, guru wisesa , miwah guru swadhyaya.

Ida dane sareng sami , yan baosang indik eedan upakara ,inggih punika :

§    Upakara Pekalan – kalan

§    Upakara pangekeban

§    Upakara ngendag

§    Pemargin tata cara mesangih sane kesaksiang antuk tri upasaksi

§    Pemargin upakara mejaya-jaya

Yan srana sane kaanggen , inggih punika :

§    Pahet

§    Semiti

§    Kikir

§    Sangian

§    Kunyit, pamor, madu lan sekar ura

§    Lekesan, pedanggal, tikeh plasa, bale gading, telaga ngambang, miwah bungkak nyuh gading

Makasami srana punika kaanggen ring upakara inucap, tur sampun sumeken maderbe pikenoh utawi tetujon soang – soang. Titiang nenten ngaturang polah – palih pemargin upakara , tur napi pikenoh srana – srana sane odar titiang iwawu, ngiring ring galahe sane siosan baosang .

Ida dane sane kusumayang titiang , yan pupulang titiang sarining atur dharma wacana iwawu , makadi asapuniki :

v   Kaping siki                   : Upakara puniki wenang kemargiang kedasarin antuk manah lascarya suci nekeng tuas, guru rupaka ngupapira i pianak mangda dados sang suputra. Taler kadasarin antuk pustaka – pustaka suci sane maderbe tetujon ngicalang utawi nyomiang kawisayan asuri sampad dados daiwi sampad.

v   Kaping kalih     : Sumangdane iraga uning tetujon upakara utawi prasida ngesehin laksana, pikayun muah baos kadi sane katreptiang ring tetuek Tri Kaya Parisudha.

v  Kaping tiga                  : Metatah kemargiang olih umat hindu ri sesampunne munggah dae truna manut desa, kala, patra muah sastra agama.

Inggih ida dane sareng sami sane wangiang titiang, wantah asapunika antuk titiang matur ring ida dane , indik suksman metatah utawi mesangih. Menawi wenten atur titiang sane ten menggah ring kayun , titiang nunas gung pengampura riantukan titiang jadma kari wimuda.

Puputang titiang antuk paramashanti

‘Om shanti shanti shanti om’